Veðrið í dag – um lágtrýstið
Ringa veðrið í dag hevur skikkað sær eftir forsøgnunum, sum vórðu gjørdar í gjár.
Talan er um eitt lágtrýst, sum tók seg upp sunnan fyri Flemish Cape fyri trimum døgum síðan, og eftir tað er tað dýpt skjótt – ógvuliga skjótt – og hevur flutt seg við nógvari ferð hendavegin.
Tað eru vindar í erva, sum gera av, hvussu lágtrýst taka seg, hvussu tey dýpast og hvønn vegin tey ferðast.
Men, sum sagt, so hevur hetta lágtrýstið uppført seg, júst so sum roknað hevur verið við.
Í dag verður væntað, at tað ferðast í ein landnyrðing-norðan, beint fram við eysturstrond Íslands. Ímeðan tað fer framvið vestan fyri Føroyar, fer ættin at flyta seg úr suðuri til vestan.
Seinnapartin í morgin er tað farið so langt norður um okkum, at vit ikki merkja tað meira.
So kemur eitt annað, men tað er als ikki so máttmikið, og so aftur eitt eftir tað….