Áhugavert tiltak
Leygardagin 6. apríl var skipað fyri felags ítróttardegi. KÍ høllin var karmur um tiltakið, sum var fyriskipað frá kl. 11.00 til 14.00.
Tiltakið var ein liður í átakinum hjá ÍSF, sum hevur heitt á ítróttarfeløgini í Føroyum, um at hava opið hús hendan dagin.
Norðlýsið leitaði sær eisini inní KÍ høllina um 11.30 tíðina og um 13.30 tíðina. Hugaligt var at síggja hvussu var gjørt burturúr, og eldsálirnar í teim ymsu feløgunum vóru har. - Men tað tóktist ikki sum um at luttøkan var serliga stór. Tað var eitt sindur harmuligt at síggja, tí hetta var so avgjørt eitt sera áhugavert tiltak og eitt gott tilboð til børn og ung at kunna seg um ymsar møguleikar innan ítrótt or rørslu.
Men kanska høvdu fyrireikararnir valt skeivar klokkutíðir, beint um døgurðatíð ella møguliga vóru fleiri av teim ymsu ítróttarfeløgunum so mikið frami í skónum fyrr í vikuni, tá tey høvdu opið hús hvør í sínum lagi, at gassi var farið av balónini tá tað kom til leygardagin.
Men tey, ið møttu, fingu eina góða og hugnaliga løtu leygardagin í KÍ Høllini.
Niðanfyri nakrar myndir úr KÍ høllini, og frá gongutúri út á Oyrar við myndatólinum eftir vitjanina í høllini í góða veðrinum: