Fríggjadagin, tann 12. apríl 2019, kl. 16 letur árliga Várframsýningin upp á Listasavninum. Dorit Hansen, ritstjóri á Námi setur framsýningina, og Sissal Grækarisdóttir við band fer at framføra nøkur løg til ferniseringina.

Tað verður spennandi at bjóða fólki vælkomin í Listasavnið til árligu Várframsýningina, sum er tann 30. í røðini, siga tær báðar Rannvá Holm Mortensen og Birgit Kirke, sum hava kuratera og samskipa framsýningina.

Vit eru sera takksamar fyri at hava fingið nógv góð uppskot sendandi, so tað hevur verið trupult at velja út. Íalt 19 listafólk mynda hesa framsýning, sum vit halda sera væl lýsir, hvat rørir seg á føroyska samtíðarlistapallinum. Framsýningin umfatar nógvar listagreinir, alt frá rullupylsupakka til latexhúð, umframt fótafet kring heimin.

Vit takka fyri góðan stuðul frá Tórshavnar kommunu, Okkara og Føroya Bjór, sum hava gjørt sít til, at hetta tiltakið er møguligt.

Føroysk Myndlistafólk skipa fyri árligu Várframsýningini, sum er á Listasavni Føroya í døgunum 12. apríl – 5. maj 2019.

Øll eru hjartaliga vælkomin.