20 ára gamli Aksel B. Danielsen javnaði til 2-2 í 89. minutti og gjørdi at KÍ slapp út í longda leiktíð, sum endaði við 4-3 sigri til KÍ. Hetta er aðru ferð í ár, at hann fær spælitíð á besta liðnum.

- Tá teir fingu ein leikara útvístan, so var kanska upplagt at koyra ein álopsleikara eyka inn til at fáa trýst bóltin í málið. Eg fái at vita, at eg skal liggja og lúra inni í feltinum. Tað er kanska mín størsta styrki at liggja og samla bóltar upp inni í feltinum. Simen fær bóltin og knallar til og so fangi eg ''returin''. Tað er altíð stuttligt at vinna í Gundadali og áskoðararnir vóru heilt framúr og bóru okkum fram, segði Aksel B. Danielsen við Norðlýsið eftir dramatiska dystin.