Heimsins besti billard leikari í Klaksvík
Um vikuskiftið vóru danskir billardleikarar á vitjan í Føroyum, og skipað varð fyri kapping millum donsku leikararnir úr B67 Herning og 16 føroyskar leikarar. Samlaða úrslitið bleiv ein tepur 17-15 sigur til danir.
Billardsamband Føroya og føroysku leikararnir eru sera fegnir um møgulleikan at spæla móti so sterkari mótstøðu, og hugsað verður sostatt ikki so nógv um úrslitið.
Arbeitt verður við at leggja eina ferð til Danmarkar til rættis í heyst, men nakað heilt ítøkiligt er ikki at greiða frá í løtuni.
Heimsins absolut besti billardleikari er Johnny Hansen úr Odense felagnum, Bristol, og úrmælingurin var við í ferðalagnum í Føroyum. Hann hevði billardundirvísing, umframt ein uppvísingardyst móti besta føroyska leikaranum,
Jákupi Baldvinssyni úr Fuglafirði. Í hesum dysti sást greitt, at evnini til vakra gentlemanspælið eru avbera góð. Spælt varð til 800, og uttan hóvasták knallaði Johnny eina seriu á heili 800 eygu á talvuna, og vann áðrenn Jákup kundi blunka. Var markið ikki 800, so spældi Johnny enn.
Evnaríki danin hevur í ár eitt púra ørt gjøgnumsnitt í donsku liðkappingini á heili 209. Til samanberingar liggja føroyskir toppspælarar vanliga á umleið 25-30 eygu í miðal.
Samanumtikið var tað eitt sera væleydnað billardvikuskyfti, og menn vóru samdir um, at teir á ein ella annan hátt skuldu hittast aftur til dyst.