Vár við vátakava..!..
Tað er lítið hugaligt at fara undan dýnuni, tá ið kavaæl og vátaslettingur kappast at pikka upp á rútin.
Norðoyastevnan nærkast við m.a. Royal Run og kappróðri! Hvussu verður við veðrinum í vikuskiftinum? Havi hugt eftir kortum frá ymiskum veðurstovum og eisini øðrum heimasíðum.
Kalda luftin av útnyrðingi – saman við vátaslettingi og kavaæli – fer at halda á allan dagin í dag og í morgin. Vindferðin um teir 10 m/s alla tíðina.
Fríggjanátt fer ættin at snara eysturum, úr útnyrðingi til landnyrðing, og fríggjamorgun er eysturætt. Sama vindferð, um 8 til 12 m/s. Eftir tað er luft av evropeiska meginlandinum, sum kemur hendavegin. Hetta eigur sjálvandi at síggjast aftur á hitalagnum.
So langt so gott.
Saman við heitari luft kemur regn. Viðhvørt, ið hvussu so er. Og soleiðis verður eisini hesaferð. Fríggjakvøldið fer at regna. Tað fer at regna í eina løtu, og nakað eftir midnátt fer at slíta í eina løtu. Men tíðliga leygarmorgun fer at regna aftur í nakrar tímar, og vindur veksur eitt sindur.
Ikki lætt at siga, hvussu leingi tað regnar, men til middags ella har á leið. Kanska ein ella tveir tímar út á seinnapartin. Eftir tað støkkur ættin niður í útsynning-sunnan, tað slítur í, og vindurin minkar niður í nokkso lítið.
Enn eru 3 samdøgur til renningina og eitt sindur longri til kappróðurin. Viðurskiftini í lufthavninum kunnu enn broytast, men soleiðis sær út í morgun.
Norðoyastevnuveðrið verður dagført her í morgin.