So effektivt drenar landsstýrið Norðoyggjar fyri vinnuligt avlop
Eitt av vinnuligu lokomotivunum í Norðoyggjum, JFK-samtakið, hevði í fjør eitt samanlagt avlop á 66 mió. kr., men við ovurstórum veiðugjøldum og uppboðssølum á 63 mió. kr. inn í landskassan hava Tjóðveldi, Javnaður og Framsókn syrgt fyri at drena JFK fyri allan vinning í 2018.
Avleiðingarnar av hesum verða álvarsamar fyri Norðoyggjar.
Fyri tað fyrsta við færri lønarútgjaldingar og keyp av tænastum frá hjávinnum í lokalsamfelagnum.
Færri lønir og inntøkur til hjávinnur í lokalsamfelagnum skerjir eisini inntøkur og keypiorku hjá hesum persónum og fyritøkum.
Fyri tað annað setur hetta - um tað sleppur at halda fram - ein ræðandi effektivan stoppara fyri, at JFK kann gera nýíløgur.
Harumframt fær hetta sera óhepnar avleiðingar fyri Norðoyggjar, tí uttan avlop fer JFK-samtakið framyvir ikki at kunna viðvirka til og luttaka í nýggjum, mennandi virksemi í lokalsamfelagnum, so sum JFK so mangan hevur gjørt.
Ístaðin verða hesar tíggjutals mió. kr. drenaðar úr fyritøkuni og inn í landskassan at brúka til almennan rakstur, almennar lønir o.s.fr.
Hóast JFK-samtakið hevur sent út tíðindaskriv um hesi viðurskifti, so hevur almenna kringvarpið ikki gjørt serliga nógv burtur at lýsa álvarsemið í hesum.
Henda fyri Norðoyggjar so skaðandi nýskipan hjá Tjóðveldi, Javnaðinum og Framsókn kann á ongan hátt kalladt vinnupolitikkur, men er í roynd og veru ein vinnuoyðing, sum má steðgast sum skjótast.
Góðu norðingar, vit mugu ikki lata hesa hóttandi gongd halda fram.
Fólkaflokkurin er bæði tilreiðar og hevur styrkina til at broyta hesa kós, um vit fáa álit veljarans til tað á komandi løgtingsvali, og sjálvur eri eg fúsur at brúka mínar politisku royndir til, at hetta skal eydnast.
Jákup Mikkelsen
Løgtingsmaður og valevni Fólkafloksins