KÍ spælir týskvøldi á Svangaskarði
Svangaskarð verður karmur um fyrsta dystin hjá KÍ í Evropa samanhangi síðan 2007, tá KÍ tapti 2-1 móti Hammarby. Dysturin millum KÍ og FK Riteriai byrjar týskvøldi kl. 18
Seinnu árini hevur KÍ leikt sínar Evropa heimadystir í Gundadali, men nú er KÍ aftur á góða gamla Svangaskarði, har KÍ leikti sínar heimadystir í 90’unum og 00’unum. Hetta fer uttan iva at gera sítt til at fleiri fólk verða til dystin.
Arbeitt verður av øllum alvi at gera vøllin og kringumstøðurnar í Klaksvík nøktandi til Evropa dystir, og tá Bláa skýli stendur liðugt, so er komið væl á veg, at røkka tí málsetninginum.
Men týskvøldi kemur litaviska liðið FK Riteriai á vitjan at leika returdystin móti KÍ. Fyrri dysturin endaði við javnleiki 1-1 við máli frá liðskiparanum Jákup B. Andreasen. Útivallarmálið er gott hjá KÍ at hava í skjáttuni, men tað verður alt avgjørt á Svangaskarði.
Dysturin byrjar kl. 18.00 og atgongumerkir kunnu keypast á www.atgongumerki.fo ella við dyrnar, um tað verða nøkur eftir.
Evropa dystir og úrslit hjá KÍ á Svangaskarði
- 1992: KÍ-Skonto Riga 1-3
- 1995: KÍ-Maccabi Haifa 3-2
- 1997: KÍ-Ujpest 2-3
- 1999: KÍ-Grazer AK 0-5
- 2000: KÍ-Crvene Zvezda 0-3
- 2002: KÍ-Ujpest 2-2
- 2003: KÍ-Molde 0-2
- 2007: KÍ-Hammerby 1-2