Eftir tveir dagar við góðum veðrið og glaðum festivalgestum, verður endabresturin nú skotin í gongd. Nógv tónleikanøvn eru á skránni í kvøld, og veðrið sær út til at blíva heilt gott.

Veðurmaðurin hjá Norðlýsinum, Hanus Kjølbro, segði í gjár, at tað verður turt í alt kvøld. Vindurin kemur at liggja um 5 m/s av útsynningi.

Hans Andrias letur spæliplássið upp kl. 17:20, meðan Jógvan tekur yvir kl. 18:30.

Sangløtan
Fólksliga sangløtan verður á sandinum kl. 19:30. Ein breiður skari av sangarum koma at framføra, eitt nú M.C. Restorff og Danny Baldvinsson. Tey á G! heilsa og siga, at umframt teir báðar, koma nógv fleiri at spæla allar okkara yndis kærleikssangir, ballingarsangir, tjóðskaparsangir og barnasangir. 

Fjølbroyttur tónleikur alt kvøldið
Bretski bólkurin Ferris & Sylvester framførir á Spæliplássinum kl. 20:55. Um bólkin sigur G! Festivalurin m.a. soleiðis:

Ferris & Sylvester eru í støðugari framgongd. Tey hava fleiri milliónir stroymingar á Spotify og hava ligið nummar 1 á iTunes ‘Singer-Songwriter’ listanum. Ferris & Sylvester eru eisini viðurkend av altjóða tónleikamiðlum. MOJO ummælti tónleik teirra sum eitt ‘masterpiece of Folk Rock’, ímeðan Rolling Stone útnevndi tey á listan ‘Top 10 country nøvn at halda eyga við’ og lýsti ljóðið hjá bólkinum sum “a rich and fully realized sound that leaves one pining”. 

Greta Svabo Bech spælir á sandinum kl. 22:10. Um Gretu siga tey á G! soleiðis:

Við ljóði og myndum skapar Greta eina hugtakandi og dreymakenda mynd av lívinum í Føroyum. Greta skrivar og framleiðir sín egnað tónleik, har hon skjalfestir sín fjarskotna heim við framúrskarandi infrareyðari myndatøku. Við sínari list, skapar hon samstundis eina kenslu av vøkrum umhvørvi og myrkakendari avbyrging.

Íslendsku EMMSJÉ GAUTI spæla á Spæliplássinum kl. 23:35. Um teir, siga tey á G! soleiðis:

Yvirdrivin poppur, skemtingarsemi og meistaralig rím eyðkenna íslendska Emmsjé Gauta, sum hevur tryggjað sær pláss í íslendsku tónleikasøguni við løgum sum "Silfurskotta" and “Reykjavík”. 

Ein av størru løtunum verður heilt vist kl. 00:30 tá Fatboy Slim spælir síðstu konsertina á sandinum á ársins festivali. Um hann, sigur G! Festivalurin soleiðis:

Tónleikur hansara er ein heimur av widescreen sinnisrörslum, psykadeliskum ljóði og besta dansitónleikinum, tú nakrantíð hevur hoyrt. Hann hevur vunnið tíggju MTV Video Music Awards, tvær Brit Awards og hevur ligið á tindunum á tónleikahittlistum kring heimin seinastu tjúgu árini.

Á palli hevur Fatboy Slim skapað enn fleiri yvirskiftir: Á eini uttandurakonsert á Brighton Beach var av fyriskiparunum væntað, at 60.000 áhoyrarar fóru at koma til framförsluna - har komu 250.000 fólk. Hann hevur latið pallin á Glastonbury upp í 2006 og latið olympisku leikirnar í London í 2012 upp. Framförslan á olympisku leikunum fór fram á einum risastórum uppblásiligum högguslokki.

Síðsta konsert á Spæliplássinum verður kl. 02:20, tá KANNSKA! framførir.

Umframt hesar konsertirnar, eru nógvar framførslir í Grundini og Fjósinum. Sí skránna niðanfyri.