Atli Gregersen takkar fyri seg á landsliðnum
Í gjárkvøldið staðfesti liðskiparin á A-landsliðnum, Atli Gregersen, at hann takkar fyri seg eftir hesa undankappinina.
Tískil verður dysturin týskvøldið hansara seinasti á heimavølli.
37 ára gamli Atli Gregersen, sum á FM1 staðfesti sína avgerð, hevur spælt 56 landsdystir fyri føroyska A-landsliðið. Tað eru bara sjey leikarar, ið hava spælt fleiri landsdystir. Tá skal havast í huga, at Atli var næstan 27 ára gamal, tá hann fekk sín fyrsta landsdyst.
Sambært fsf.fo, so hava bara hesir sjey spælt fleiri landsdystir enn Atli Gregersen:
Fróði Benjaminsen (94)
Óli Johannesen (83)
Jákup Mikkelsen (73)
Jens Martin Knudsen (65)
Julian Johnsson (62)
Jákup á Borg (61)
John Petersen (57)
Sostatt verður dysturin móti Malta serligur á tann hátt, at bæði landsliðsvenjari og landsliðsliðskipari takka fyri seg á føroyskari jørð í sínum núverandi leiklutum. Eftir hendan dystin eru tveir útidystir eftir í november.