Hugnaliga caféin í Hvannasundi letur upp í morgin 3. desember
Tað var í august í 2017 at eldsálir í Hvannasundi tóku stig til at lata upp eina café í gamla skúlanum í Hvannasundi. Caféin er vanliga opin upp undir jól um veturin og síðani um summarið.
Í morgin letur so "Café Old School" upp aftur. Myrna Lind Jacobsen, ein av fyrireikarunum sigur, at Caféin verður opin týsdag, mikudag og hósdag frá kl. 16.00 til 19.00.
Í Norðdepli verður eisini handilin við gomlum brúkslutum, "Gamalt Gull" opin, so tað er lag á manni at fara sær ein túr norður í Hvannasund, um ein hevur hug til eina hugnaliga kaffiløtu ella at hyggja sær um eftir gomlum brúkstingum í "Gamalt Gull". Eg var har fyri tveimum døgum síðani og tá hevði eg góðan hug á einum fittum torvkassa. Men tí verri dugdi eg ikki at finna hóskandi pláss fyri honum heima. Men har var mangt og hvat spennandi at síggja, skuldi eg heilsa og siga.