Smoltstøðin á Strond hevur sett 1,1 millión smolt út í ringarnar
Hóast heimsins størsta smoltstøð enn er eitt byggipláss, so gongur við rúkandi ferð at framleiða smolt til aliringarnar hjá Bakkafrost.
Rógvi Jacobsen, stjóri á smoltstøðini á Strond sigur, at hóast Bakkafrost í løtuni bert hevur yvirtikið helvtina av bygninginum á Strond ímeðan liðugtgerð av restini av heimsins størstu smoltstøð framvegis er í gongd, so hevur støðin longu nú í tveimum umførum latið smolt, sum er ment á støðini til aliringarnar hjá Bakkafrost.
Ætlanin er, at vit skulu framleiða smolt upp til 500 gram, men tørvurin á smolti til aliringarnar er somikið stórur, at vit higartil hava ment smolt her á støðini til 220-320 gram, sum vit hava latið ringunum hjá Bakkafrost.
Vit hava latið um1,1 millión smolt í hesi støddini. Aðrenn vit kunnu lata smolt út, sum eru 500 gram, so er í fyrsta umfari neyðugt at byggingin av støðini verður liðug, og harafturat mugu vit fáa stundir at byggja okkum neyðuga biomassan upp.
Einaferð var tosað um at støðin skuldi standa liðug á jólum í ár, men tað verður ikki. Men líkt er til at liðugt verður at byggja støðina komandi summar. Vit rokna við at kunna seta smolt út komandi summar, sum er 350 gram og í 2021 skuldi framleiðslan av 500 gram smolti verið komin í fasta legu, sigur Rógvi Jacobsen, stjóri á smoltstøðini á Strond.