Býráðslimurin skrivar:
 
Tá ið steyp og meistaraheiti verða vunnin til Havnina, stendur borgarstjórin og ovasta leiðsla á Vaglinum ikki aftast. Nei, tá er einki óført við móttøkum og røðum, har tað enntá kann henda seg, at okkurt gylt lyfti sníkur seg uppí, nú hýrurin er so góður allíkavæl.
 
Veruleikin er bara ofta ein annar, tí tá ið gerandisdagurin kemur, er tað ikki altíð, at býráðið er til ta stóru hjálpina – kanska heldur tvørturímóti!
 
Hetta kunnu fótbóltsfeløgini í Gundadali sanna, nú alt liggur í bølamyrkri. Á fundi í november, har borgarstjórin var við, varð lovað feløgunum, at tey skuldu hava ljós, tá ið venjingin byrjaði aftur, men í gjár komu tey til ein bølamyrkan Gundadal.
 
Enn einaferð kunnu vit tíverri staðfesta, at ítrótturin sum heild eigur ongan góðan í sitandi býráðssamgongu. Vallarljósini í Gundadali hava í fleiri ár koyrt upp á undantaksloyvi, og vøllurin er hartil sera illa slitin, men hóast Vaglið veit av øllum hesum, hendir bara púrt einki.
 
Gamaní vórðu fimm milliónir krónur í evstu løtu settar av í fíggjarætlanini fyri í ár, men tær røkka ikki langt, nú allir tríggir graslíkisvallirnir í Gundadali skulu skiftast, umframt at ljósviðurskiftini á bæði ovara og niðara vølli eru út av lagi vánalig.
 
Feløgini í Havn, sum brúka nógva orku og nógvan pening til sítt virksemi, umframt at ein rúgva av fólki leggur lív og sál í felagsarbeiði, merkja lítið til nakran vælvilja frá ovastu sovjettini á Vaglinum.
 
Nú allar fótbólts-Føroyar brynja seg út til kappingarárið 2020, standa havnarfeløgini við umstøðum, ið eru verri enn hjá nøkrum øðrum. Og hendir einki munagott beinanvegin, so virksemið kann koyra sum vanligt, fer tað eisini at ganga út yvir børnini, sum eisini eru spent eftir at sleppa í gongd aftur.
 
Sjálvandi skulu ábøtur gerast, men tað er mær ein gáta, hví hesar ikki kunnu gerast, tá ið kappingin liggur still og tað darvar minst møguligt. Vit vita, at uppstarturin av einum kappingarári hevur so stóran týdning, so tí kemur tað sera illa við, at havnarfeløgini ikki fáa vant og fyrireikað seg, sum tey plaga at gera og sum teirra kappingarneytar gera kring landið.
 
Vónandi vaknar Vaglið, hóast tað longu er í seinna lagi, so – um ikki annað – ljósviðurskiftini verða fingin í rættlag beinanvegin. Hendir tað ikki, eru í øllum førum minni sannlíkindi fyri, at orsøk verður til tær nógvu røðurnar og móttøkurnar í heyst.
 
Tróndur Sigurðsson
býráðslimur í Havn