Fráfaringarløta fyri sparikassamanninum og tónleikaranum Eyðun Nolsøe í dag kl. 14
Í dag kl. 14 – 16 verður høvi at heilsa uppá Eyðun Nolsøe í høvuðsdeildini hjá Norðoyar Sparikassa, sum fyri 35 árum síðan tók við starvi í sparikassanum. Eyðun verður nú pensjónistur, men heldur tó fram við tónleikinum. Longu 28. mars verður Eyðun aftur á palli í høllini á Nabb, tá hann saman við bólki sínum Hjarnar, skal spæla nú kendi enski bólkurin “Slade” vitjar. Tað eru 46 ár síðan at Eyðun Nolsøe, sum limur í bólkinum HJARNAR, fyri fyrstu ferð trein inn á pallin í Atlantis í 1974.
Eyðun byrjaði yrkileið sína sum bankamaður í “Norðoya Banka – Sjóvinnubankin” og hevur havt fleiri ábyrgdarstørv í Norðoya Sparikassa síðan 1984. Seinastu árini hevur Eyðun verið starvsfólkaleiðari og er hann kendur sum ein vinsalur og sera fyrikomandi maður ið altíð er skjótur við onkrari skemtiligari viðmerking.
Eitt skifti sat hann sum starvsfólkaumboð í nevndini í sparikassanum.
Eyðun er ikki ein persónur, sum dámar at hóvasták verður gjørt burtur úr sær sjálvum, men dagurin kundi ikki fara ónevndur aftur við borðinum.
Høvi er at heilsa uppá Eyðun í høvuðsdeildini í Norðoya Sparikassa í frá kl. 14 til kl. 16.