Vesturætt í dag
Hann liggur av vestri í dag, og tað er eitt sindur av vindi.
Allar støðir hjá Vørn siga frá somu ætt, men ymiskt er við vindinum. Mestur vindur er í Mykinesi, 22 m/s; minsti vindur er í Akrabergi, 7 m/s.
Hátrýstið við tí methøga trýstinum, sum var um okkara leiðir í vikuskiftinum, er nú viknað nakað, samstundis sum tað hevur flutt seg burtur frá Føroyum í ein útsynning. Lágtrýst við vindi og avfalli nærkast okkum norðaneftir.
Tí er eitt sindur av vindi í dag, í kvøld og í nátt. Í morgin ári minkar vindurin eitt sindur.
Vindurin er minkaður eitt sindur kring landið síðan í nátt. Miðalvindferðin var 15 til 20 m/s. Nú er hon 10 til 15 m/s. Okkurt ælið er í støðum við regni, og hitin liggur um 4 til 6 stig.
Soleiðis verður veðrið allan seinnapartin eisini. Møguliga eitt sindur minni av vindi eina løtu eftir døgurða.
Í kvøld fer vindurin at veksa eitt sindur. Um 20 tíðina kemur eitt brúgvalag norðaneftir við regni ella kava. Hitin fer at minka nøkur stig. Tá ið tað slítur í 3 tímar seinni, støkkur ættin upp í útnyrðing.