Veðrið um páskirnar
Eitt lot av vestri og útsynningi í dag, um 3 til 8 m/s. Hetta er lýggj luft, sum kemur langt sunnaneftir. Í kvøld verður henda lýggja luftin trokað burtur av kaldari luft, sum kemur úr Norðurgrønlandi.
Har sum heitt og kalt møtast, har verður skýggjað og tað kann eisini regna ella kava. Tað velst um hitalagið ta løtuna.
Kalda rákið av luft fer at vera í alla nátt og í allan morgin, páskadag. Páskakvøld minkar vindurin eitt sindur, og mánanáttina fer hann aftur at koma úr útsynningi.
Meira ítøkiligt um veðrið á páskum, so fer útsynningurin at liggja til nátturðatíð í kvøld. Tá fer ættin at flyta seg upp ímóti norði, samstundis sum eitt brúgvalag við regni kemur yvir okkum norðaneftir.
Ein tíma fyri midnátt – ella so – er vindferðin farin upp í 13 til 18 m/s av norði, og ein tíma ella tveir eftir midnátt er slitið í. Hitin fer skjótt niðureftir. Tíðliga páskamorgun er hitalagið komið niður í 2-3 stig.
Páskadag fer hann at liggja av norði ella vesturhallum norði. Vindferðin um tíðliga um morgunin 13 til 18 m/s, men vindurin fer at minka spakuliga allan dagin. Á middegi eru 10 til 15 m/s; klokkan 18 eru 5 til 10 m/s. Burtursæð frá nøkrum ælum á morgni, verður páskadagurin turrur.
Seint í annaðkvøld er vindferðin minkað niður í 5 m/s, og ættin hevur flutt seg úr vesturhallum norði til únyrðing. Mánanáttina fer hann niður í vestan – framvegis lítil vindur, um 5 m/s. Út á fyrrapartin fer hann niður ímóti útsynningi, og vindferðin veksur eitt vet, upp í 5 til 10 m/s. Turt annan páskadag, allan dagin – og hitin fer at liggja um 2-3 stig á morgni, men hækkandi upp í 6-7 stig út á seinnapartin.
Her av veðurredaksjón Norðlýsisins verður ynskt øllum okkara mongu lesarum kring landið og uttanlands einar gleðiligar páskir.