Tað verður eitt heilt serligt umfar, ið fer í gongd í dag. Tað verður uttan áskoðarar, men við heilt óvanliga stórum útlendskum áhuga. Orsøkin er, at føroyska kappingin er tann fyrsta í Europa, sum byrjar aftur eftir koronasteðg. Fleiri túsund fólk fara at sita og hyggja umvegis sjónvarpsrásir ella stroyming,

KÍ hevur eina av heilt torføru uppgávunum í 1. umfarinum. Liðið við teimum bestu hagtølunum í Klaksvík síðstu árini, B36, vitjar. Og eftir tapið í FM-finaluni í fjør, so er lítil ivi um, at tað verður eitt sera tendrað og uppsett B36-lið, sum kemur til Klaksvíkar at halda sterku siðvenjuna við góðum úrslitum í Klaksvík. Topp 5 liðini kunnu øll vinna FM realistiskt sæð, men tey flestu hava júst KÍ og/ella B36 sum eitt sindur størri favorittar enn hini trý.

Hjá KÍ er Óli Ey. Poulsen ikki tøkur vegna skaða. Fleiri aðrir leikarar eru ivasamir vegna skaðar. Teir eru Jákup B. Andreasen og Páll A. Klettskarð. Jesper Brinck og Odmar Færø hava ikki spælt nakran venjingardyst eftir koronasteðgin, men fyrr í vikuni var væntað, at báðir blivu klárir. Hjá B36 eru tríggir leikarar ivasamir. Teir eru Sebastian Pingel, Hugin Samuelsen og Brian Jakobsen.

Dysturin í Klaksvík byrjar kl. 17.00 og dómari verður Alex Troleis. Dysturin kann keypast hjá Televarpinum á tv.fo.