Av Hattarvík á Hvannasund
Sunnudagin eydnaðist tað so at sleppa aftur av Fugloynni, eftir at hava havt ætlanir um tað leygardagin. Men leygardagin var ikki veður, hvørki á Kirkju ella á Hattarvík hjá Rituni at leggja at.
Men sunnudagin var fínast veður, eg var liðugur við tað eg skuldi gera á Fugloynni, so eftir var bara at fara umborð á Rituna, eftir at hava sagt farvæl við Jastrid og Símun Gullaksen, hjúnini á Uppistovugarðinum, sum høvdu hýst mær og Elsu síðani mikudagin. Ørindi míni á Fugloynni var at skriva eina grein úr Hattarvík, og eftir ætlan kemur hon fríggjadagin í blaðnum.
Vit fingu ein fínan túr inna á Sund. Leiðin gekk suður um Svínoynna, um Eysturhøvda inn á Svínoyarvík og síðani um "andlitini" á Draganum, Glyggin, um Høvdan í Skoparan og Heltnina so fram við Akslatanga í "havsbøll og fram við Havnina og Tangarnir og á Hvannasund.
Ein framúr framsýningartúrur í góðveðrinum. Niðanfyri nakrar myndir, onkur kennist helst við: