Stóra gjøgnumbrotið hjá 18 ára gamla Jonn Johannessen
Yngsti leikarin á KÍ-liðnum var sera eyðsýndur mikukvøldið.
18 ára gamli Jonn Johannessen fekk møguleikan frá byrjan í álopinum saman við Ole Erik Midtskogen. Hann spældi væl móti Víkingi sum innskifari og hesaferð fekk hann møguleikan frá byrjan í einum topp 5 útidysti. Jonn hevur áður skorað nøkur mál fyri KÍ, eisini í Europa League, men hetta var kanska toppdysturin, har hann fekk sítt stóra gjøgnumbrot. Jonn skoraði eitt gott mál og skoraði Jóannes Bjartalíð uppá brotssparkið, sum hann plagar, so fekk hann eisini eitt upplegg. Harafturat kom hann til nógvar góðar álopsstøður og var sum heild millum teir mest eyðsýndu á vøllinum.
Jonn hevur í fyrstu átta umførunum fingið møguleikan frá byrjan í trimum dystum, men tað talið fer helst at lutfalsliga hækka komandi umførini, um avrikini halda fram at vera eins sannførandi sum hesi seinastu tvey umførini, har talan hevur verið um sterk mótstøðulið.