Ein høvuðsuppgáva hjá stovninum er at fylgja við og fyribyrgja útbreiðslu av smittandi sjúkum. Tí hevur Statens Serum Institut ein týðandi leiklut í koronatilbúgvingini í Danmark.

Umframt at granska, so virkar Serum Instituttið eisini sum alment viðurkent goymslustað fyri blóðroyndir, vevroyndir og annað. Men stovnurin virkar undir strangum treytum, og skal umsita heilsuupplýsingarnar við virðing fyri teimum, ið hava latið royndirnar.

”… man skal som borger kunne stole fuldt på, at der bliver passet på ens sundhedsdata”, sum Heilsumálaráðharrin Magnus Heunicke tekur til í tíðindaskrivið í dag, tá hann boðar frá tænastumannakanning, tí ivi er sáddur um treytirnar verða hildnar.

Í Føroyum hava Landssjúkrahúsið og Heilsufrøðiliga starvsstovan staðið fyri øllum koronakanningum til nú, ið løgtingið samtykti at tvær privatar fyritøkur skulu standa fyri koronakanningunum.

Fyrstu tvær vikurnar – frá 27. juni til 10. juli – fáa tær 4 milliónir krónur fyri arbeiði. Og frameftir skal hvørt eitt einasta komandi ferðafólk rinda 390 krónur fyri eina korona roynd.

Men ongin hevur upplýst, um nakað heilsufrøðiligt eftirlit er við hesum viðkvomu upplýsingum, hvussu  royndirnar verða goymdar, og um tær til dømis kunnu blíva seldar til gransking.

So í grundina vita vit ikki, um privatu fyritøkurnar fáa bonus burturúr okkara koronaroyndum við at selja upplýsingarnar til onnur, og tí  kann tað tykjast sum landsstýrið heilt hevur lopið um setningin hjá  danska starvsbróðurinum Magnus Heunicke: ”man skal som borger kunne stole fuldt på, at der bliver passet på ens sundhedsdata.”

https://www.dr.dk/nyheder/indland/kammeradvokaten-anbefaler-direktoeren-statens-serum-institut-fyret