Miðlahúsið gevst við mánadagsútgávuni
Sambært haldaraskipanini á heimasíðuni hjá sosialinum sæst, at mánadagsútgávan hjá sosialinum fer í søguna
Tað er ikki langt síðani at Miðlahúsið gavst við Vikublaðnum, sum kom í hvørt hús. Nú er tað greitt, at mánadagsútgávan eisini er farin í søguna. Mánadags-Sosialurin, sum hevur verið “flaggskipið” innan vikuligar ítróttarfrásøgnir í Føroyum, kemur ikki útaftur, sambært haldaraskipanini á heimasíðuni hjá Sosialinum.
Tað verður saknur í skrivingini hjá m.ø. Tróndi Arge, Eyðuni Klakstein, Hera Simonsen og Jóannesi Hansen o.ø. Vit fara at royna at fáa ein viðmerking frá leiðsluni í Miðlahúsinum.
Undan koronakreppini komu trý bløð frá Miðlahúsinum. Sosialurin kom út mánadagar, sum serliga var eitt ítróttarblað, mikudagar kom eitt ókeypis blað, og so vikuskiftis-Sosialurin.