Tað fløvaði uttan iva fleiri staðni í útjaðaranum, tá Elsebeth Mercedes Gunnleygsdóttir kunngjørdi, at ætlanin er at geva Bústøðum heimild at læna 400 milliónir, harav í minsta lagi 100 milliónir verða markaðar til bústaðir í útjaðaranum. Spurningurin er bara, um 100 milliónir eru nokk. Eftir øllum at døma kunnu umleið 75 bústaðir spyrjast burturúr hesum, og hóast allur bati bøtir, eigur at verða farið longur enn so.

Leingi hevur tað verið ein stórur trupulleiki, at teir føroysku peningastovnarnir ikki vilja fíggja bústaðir í útjaðaranum. Hví so er, kunnu teir sjálvir svara fyri, men fyri útjaðaran er tað ikki umráðandi at vita hví. Bara tað, at tað ikki verður gjørt, er ringt í sær sjálvum, uttan mun til hvør orsøkin er. Fólk sum vilja búgva á bygd, sleppa ikki tað, og verða kanska noydd at flyta til stórplássini, har tað ikki stendur á at fáa fígging.

Her kunnu Bústaðir koma inn í myndina, annaðhvørt sum framhald av gamla Húsalánsgrunninum, sum var upprunin til Bústaðir, ella sum útleigari – ella bæði. Eitt nú kann man hugsa sær, at Bústaðir keypa tóm hús á bygd, sum vanlig fólk ikki fáa fígging at keypa, og selur tey aftur til tey fólkini uttan avkastskravið, sum bankarnir hava. Hetta er ikki kappingaravlagandi fyri peningastovnarnar, tá teir sjálvir ikki eru áhugaðir í at fíggja hesi húsini. Møguliga kundi ein treyt verið, at fólk vístu fram eitt skrivligt avslag frá bankanum, áðrenn tey fingu fígging frá Bústøðum í staðin.

Ein annar møguleiki er eisini, at Bústaðir keypir tóm hús í útjaðaranum og leigar tey út. Tann triði møguleikin, sum helst er tann, sum liggur í kortunum beint nú, er, at Bústaðir byggir nýtt úti á smáplássunum og leigar nýggjar íbúðir út. Tá tað kemur til góðsku, er hetta uttan iva tann besta loysnin, men tá tað kemur til prís, so er onnur av hinum loysnunum helst betra. Men tað nýtist ikki bert at vera ein leistur.

Higartil hevur Bústaðir bygt mest í Tórshavn, og sum skilst, er tað eisini komið væl við hjá teimum bústaðarsøkjandi har. Men Føroyar hava fleiri avbjóðingar. Bústaðarneyðin er ein trupulleiki, meðan fólkafráflyting helst er ein størri trupulleiki. Við at byggja í Tórshavn loysa Bústaðir bert annan av hesum trupulleikunum, meðan við at byggja, selja ella leiga út í útjaðaranum loysa Bústaðir báðar.

Hervið er ikki sagt, at onki skal byggjast afturat í Tórshavn, men nú mest er bygt har seinnu árini, eiga onnur tørn at fáa fremstu raðfesting. At fyribyrgja fráflyting kann vera høvuðsfokus hjá Bústøðum í nøkur ár, har dentur verður lagdur á at byggja fjølbroyttar bústaðarmøguleikar í útjaðaranum í Føroyum, meðan virksemið í Tórshavn verður skert nakað hesi árini, tó sjálvsagt uttan at blíva heilt burtur.

So hvørt útjaðarin minkar í fólkatali, gerast Føroyar sum samfelag tað fátækari. Við nýggja bústaðarpakkanum hjá Landsstýrinum er eitt gylt høvi at raka 2 flugur við sama smekki, nevniliga bæði at mótvirka fráflyting og at mótvirka bústaðarneyð. Tí er at vóna, at tá tær fyrstu 100 milliónirnar eru uppi, og minst 75 bústaðir afturat eru klárir at flyta inn í í útjaðaranum, verða fleiri milliónir funnar til sama endamál.