Endurnýttu eldri stálalibrúk
Rógvi Jacobsen, stjóri á smoltstøðini hjá Bakkafrost á Strond, fegnaðist í dag um at alibáturin Hans á Bakka kundi koma at á Strond í dag eftir vatni, sum skipið skuldi brúka til avlúsingararbeiði.
Rógvi Jacobsen sigur, at tað er Mekanor, við Kjartan Hansen, ið hevur staði fyri arbeiðinum at endurnýta eina eldri stálalirammu til atløgubryggju á Strond. Vit hava fyri neyðini, at skipini, ið skuldu taka smolt umborð frá okkum á smoltstøðini, so ómakaleyst sleppa so nær okkara kørum, sum gjørligt. Tað er alneyðugt at fiskurin ikki verður stressaður ov nógv, tí hava vit valt at gjørt hesa fyribils atløgubryggjuna burturúr einum eldri alibrúki, ið ikki verður brúkt til aling longur.
Arbeiðið hevur heppnast sera væl og í dag kundi so Hans á Bakka koma at her at fáa vatn umborð til avlúsingararbeiði, sum skipið skal fáast við. Hóast vindurin var nógvur í dag, og onkrar smá justeringar eru, sum vit skulu gera, so gekk bara heilt væl, sigur Rógvi Jacobsen, stjóri á heimsins størstu smoltstøð.