Vánaligt busssamband í Norðoyggjum
Tað er fallið fleiri fólkum fyri bróstið, at ferðaætlanin hjá Bygdaleiðum til økið Eystan Múla passar hvørki skúlanæmingum ella verkafólki. Tí er stóri spurningurin, hvønn ferðaætlanin í heila tikið er gjørd til, tí eftir øllum at døma eru fá og ongi fólk, sum taka bussin norðureftir kl. 8:25 ella kunnu loyva sær at bíða við at fara av Viðareiði klokkan 9, tá fyrsti túrur fer haðani.
Á sosiala miðlinum Facebook finst ein borgari í Hvannasundi at SSL, tí í ferðaætlanini hjá teimum stendur fyrsti túrur at fara av Viðareiði klokkan 9 fyrrapart, og tað er sjálvsagt ómøguligt hjá skúlanæmingum, sum vanliga byrja kl. 8, og hjá arbeiðandi fólkinum, hvat antin tey byrja kl. 8 ella 9, at gera gagn av. Og líka ringt er tað hin vegin, skilst, tí tá koyrir SSL kl. 15:50, tíggju minuttir áðrenn loknan arbeiðsdag hjá teimum, ið eru liðug kl. 16, og so ikki aftur fyrrenn kl. 18:10. Ilt er at síggja, hvørjum man vil gagna við tílíkari ferðaætlan.
Ein miðnámsskúlalærarari, ið starvast á Miðnámi á Kambsdali, vísir á, at næmingar úr Norðoyggjum, Klaksvík undantikin, ofta bíða í fleiri tímar á skúlanum, tí tey ikki sleppa aftur til økið Eystan Múla fyrrenn um kvøldið, eisini tí at ferðaætlanin hóskar so illa til skúladagin.
Av viðmerkingunum til tað, borgarin førir fram, framgongur, at Bygdaleiðir siga seg hava spurt seg fyri hjá staðkønum, áðrenn teir løgdu ferðaætlanina, men ongin veit, hvørji hesi staðkønu eru, sum SSL skal hava tosað við. Í øllum førum tykjast tey ikki at hava tikið fyrilit fyri teimum mongu, sum skulu í skúla hvønn morgun kl. 8, ella fólki við vanligum arbeiðstíðum so sum kl. 8-16 ella kl. 9-17.