Klárt at seta hol á stýriborðssíðu á Norðborg
Tað krevur ógvusliga nógv arbeiði at skifta blokkin á motorinum á einum skipi sum Norðborg. Jón Rasmussen, skipari á Norðborg sigur, at teir hava valt at lata arbeiðið upp í hendurnar á KSS í Klaksvík og Mest í Havn at gera stóra arbeiðið.
KSS stendur fyri allari avmongeringini av gamla motorinum og at monterað alt tilhoyrið á nýggja blokkin. MEST hinvegin, skal taka sær av at taka blokkin úr maskinrúminum, fram ígjøgnum undirlastina, upp í yvirlastina, og so tætt upp undir dyrkið, sum til ber og síðani at flyta blokkin eftir H skinnarum av skipinum og í land.
Jón Rasmussen, skipari, ið á myndini omanfyri stendur og hyggur eftir arbeiðinum, har klárt er at skera hol á síðuna á Norðborg, sigur at orsakað av at dekkið í yvirlastini er nakað lægri enn kaikanturin, so verður neyðugt at flyta skipið nakað frá keiini og síðani at leggja skipið nakað á liðuna. Hetta kann gerast við at pumpa vatn ella olju yvir í bakborð.
Eg rokni við, sigur hann víðari, at arbeiði at flyta motorin byrjar í morgin mánadagin. Nýggi blokkurin kemur eftir ætlan til Føroya 31. juli, tað er Blue Water, ið stendur fyri flutninginum, tá blokkurin er her skal hol verða á síðuni á Norðborg, soleiðis at hann kann setast upp á pláss, Hann fer sjálvandi sama veg í maskinrúmið, sum defekti blokkurin fór út. Blokkurin vigar um 25 tons og er av slagnum Bergen Dielsen. Hesin er autentiskur við gamla blokkin og er góðar 8000 HK til støddar.