Norðoya Kunningarstova stendur fyri útferðum á Kalsvík við Draganum hvønn týsdag. Norðlýsið var við á einum slíkum túri seinasta týsdag.

Sum myndirnar sýna, so er hetta ein sera náttúru vakur túrur, sum byrjar á Klaksvík. Fyrst verður siglt norður ígjøgnum Kalsoyarfjørð, fram við Kunoynni, síðani yvir ímóti Kallinum, innanfyri Kalsfles, tá til ber fyri veðri og síðani á Kalsvík.

Sera hugaligt var at síggja allan fuglin á Kalsvík. Skiparin á Draganum, Kári Millum Garðarnar greiddi frá, at hann hevur ikki sæð so nógvan lomviga á Kalsvík tey nógvu seinnu árini. Sagt verður annars, at nú um ólavsøkumundið plagar fuglurin at fara úr bjørgunum, so hevur tú áhuga í at síggja røkur fyltar við lomviga, so er møguleikin helst aftur komandi týsdag, tá Norðoya kunningarstova aftur skipar fyri einum túri við Draganum til Kalsvíkar,  hesa okkara náttúruperlu.

"Tegir ikki heldur enn ritan á Kalsvík" er gamalt orðafelli. Jú, vit sóu eisini nógva ritu við unga hendan framúr vakra túrin týskvøldið í vikuni.