Norðlýsið hitti ein hugagóðan Hjalta Josephsen frá byggifyritøkuni Norðhús, sum í løtuni er komin væl áleiðis at byggja fleiri íbúðir á Norðoyri. Og nú ætla teir sær undir íbúðabygging í Klaksvík.

Sera góð staðseting

- Tað verður ringt at finna nakra betri staðseting enn hesa undir Fossum, og tí eru vit sera fegin um, at tað er eydnast okkum at fáa hesa verkætlanina upp at standa í góðum samstarvi við bæði borgarstjóran og eigaran av lendinum.

- Tað eru vit sera takksamir fyri, tí tað er eingin loyna, at tað er ein ovurstórur tørvur á bústøðum her í Klaksvík, og tí er tað alneyðugt, at allir partar samstarva um at finna loysnir, sigur Hjalti Josephsen, sum eisini er ógvuliga spentur upp á hesa komandi verkætlanina.

- Hesar íbúðirnar koma at liggja tætt við bæði miðbýin og allar frítíðaraktivitetir í býnum, og eins og úti á Oyri, so er sólargangurin eisini sera góður her.

Tríggjar ymiskar støddir

- Lendið, har íbúðirnar koma at liggja, er rættiliga slæt, og umhvørvið er vakurt, so tær koma at liggja sera væl og í hugnaligum umhvørvi, heldur Hjalti.

- Støddirnar, sum vit fara at byggja í hesum umfari, eru tríggjar ymiskar: 8 verða 84 fermetrar, 2 verða 55fermetrar, og 3 verða 112 fermetrar.

Arbeiðið byrjar í næstum

Norðlýsið ringdi eisini til Jógvan Skorheim, borgarstjóra, sum upplýsir, at henda verkætlan varð løgd fyri avvarðandi nevndir og býráðið í hefyri.

- Málið fekk breiða undirtøku, tí sum kunnugt er sera stórur tørvur á bústøðum her í kommununi.

- Best er at gera vegin inn á hetta økið undir Fossum beinanvegin, tí umframt hesar 13 íbúðirnar eru eisini onnur privatfólk, sum hava ætlanir um at byggja í sama øki, so hetta málið kemur eisini at hjálpa øðrum bústaðabyggingum í sama øki, sigur Jógvan Skorheim, borgarstjóri.