Tað var ikki hálvtalað orð, so var talan um alt miðøkið: Tórshavn, Sjóvar, Sunda, Runavíkar, Eystur, Fuglafjarðar og Klaksvíkar kommunu, sum hittast til kunnandi prát – einar fýra ferðir um árið.

Eisini verður vitjað hjá teimum ymsu kommununum fyri betur at kunna seta seg inni í tey ymsu viðurskiftini og síggja skipanir, hús, stovnar og virkir í verki.

Tá ið tað oftani er uppi at venda ymsar skipanir, sum landið hevur um hendi mótvegis kommununum, og eisini skipanir, landið og kommunurnar í felag umsita, varð hildið skilagott, at Kommunufelagið við teirra royndum samskipar hesar netverksfundir, ið so eisini hevur víst seg at verið gagnligt.

Í gjár var so avtalaður fundur at vera í Klaksvík, har vit hittust á KÍ-loftinum í KÍ-høllinum. Her hevði Dávur Winther, mentanarleiðari, eina framløgu um komandi metanarhúsið, sum verður í útbygda Posthúsinum, ið júst nú verður bygt. Her var gott at hoyra afturmeldingar frá Løkshøll og Mentanarhúsinum í Fuglafirði, sum stuðla undir tær ætlanir, lagdar eru fyri mentanarhúsið í Klaksvík, ið tó er nakað størri og annarleiðis, enn fyrr umrøddu.

Síðani sóu vit Bláaskýlið, sum er við at koma undir land, og haðani varð farið yvir í nýggja skúlan á Skúlatrøð, har eisini fundurin var hildin við fleiri ymiskum málum á skrá. Eitt nú greiddi Karin Kass, leiðari á Sjóndeplinum, frá verkætlanini "Føroyski talukennarin", ið er skipan, sum skal  gera talu til talgildan tekst og harvið hjálpa lesiveikum. Teirra ynski er, at kommunurnar stuðla hesi skipan.

Á middegi varð boðin ein betri biti á Nólsoyar Páls garðinum, sum Restaurant Fríða stóð fyri, og annars varð tikið samanum. Umsitingarfólkini frá hinum kommunum lótu væl at, at tað hendir nógv í Klaksvík, og at her vóru nógvar spennandi verkætlanir framdar og eisini enn í verki – eisini at samstarvið millum mentanar- trivnaðar- og vinnuøkið tykist vera avbera gott í Klaksvík, sum tey fegnaðust um.