Siðbundna mynstrið, har familjur ogna sær eitt grundstykki, byggja sær hús á tí, og búgva í teimum fyri lívið skal sjálvandi kunna halda fram og meira ferð skal eisini setast á tað. Klaksvíkar Kommuna skal framhaldandi útstykkja og selja grundstykkir, fleiri enn higartil, soleiðis at øll tey sum vilja og kunna búgva upp á tann mátan, skulu hava møguleikan í boði.

Men aðrir møguleikar skulu eisini vera til tey ungu, sum annaðhvørt ikki hava fíggjarligu orkuna ella ikki hug at búgva í egnum sethúsum. Í øðrum kommunum hava tey roynt seg við lutaíbúðum, ið hava verið heilt væl móttiknar, og leisturin við lutaíbúðum er sanniliga verdur at royna í Klaksvík eisini. Nakrar av hesum lutaíbúðum kunnu staðsetast í hinum bygdunum og oyggjunum, ið hoyra til Klaksvíkar Kommunu.

Møguleikar skulu eisini vera til teirra, ið hava brúk fyri fyribils bústaði til leigu. Tað kann eitt nú vera fyri ung fólk, ið hava tørv á einum staði at búgva, meðan tey spara sær upp til ein varandi bústað. Hesi skulu hava møguleika at leiga fyri ein so mikið sámuligan kostnað, at tey eisini fáa sett til síðis. Kommunurnar hava ikki í skrivandi stund heimild til at leiga út, men farast kann í dialog við eitt nú Bústaðir, har leikluturin hjá kommunum kann vera at vísa á grundstykki til ein rímiligan penga, um Bústaðir binda seg til at gera eitt ávíst tal av leiguíbúðum har.

Næmingar aðrastaðni frá, ið koma til Klaksvíkar at nema sær útbúgving, skulu allir hava møguleika til at fáa innivist undir lesnaðinum. Verandi og komandi næmingaheim skulu útbyggjast, so hvørt tað er neyðugt fyri at nøkta tørvin.

Samanumtikið ætli eg at virka fyri fjølbroyttari bústaðarmøguleikum til tey ungu í Klaksvíkar Kommunu. Bæði við siðbundnum sethúsum og lutaíbúðum eins og – í samstarvi við onnur – leigubústøðum og næmingabústøðum.

Við Klaksvíkskvøðu

Frímund Hansen
Um Eiði 8
Svínoy