FSF.fo skrivar:

Tað eydnaðist føroyska A-landsliðnum við monnum at fáa 1 stig burturúr torføra útidystinum móti Lettlandi. Gunnar Vatnhamar javnaði fyri Føroyar tá ein tími var spældur.

Føroyska A-landsliðið við monnum hevði leikliga yvirvág mestsum allan dystin, men tá avtornaði gjørdist úrslitið javnleikur 1-1 á Daugava Stadion í Riga millum Lettand og Føroyar.

Heimaliðið kom á odda í 59. minutti við máli sum Kamess skoraði. Men lettiska leiðslan helt sær bara í ein minutt, so stóð aftur á jøvnum. Bólturin endaði hjá Viljormi Davidsen, sum legði væl inn fyri úr vinstru, inni í brotsteiginum var Gunnar Vatnhamar hægstur, og við einum góðum skallara javnaði leirvíkingur til 1-1.

Seinastu løtuna royndi føroyska liðið at leggja trýst á lettlendska málið, men veruliga vandamikið gjørdist tað ongantíð. Tá so lettar fóru í mótálop vóru føroyska verjan og Teitur Gestsson trygg, og høvdu fult tamarhald á støðuni. Fleiri mál komu ikki, og liðini fingu tískil 1 stig í part.

Fyrr á degnum vann Malta 3-1 á heimavølli móti Andorra. Úrslitini hava við sær, at áðrenn seinasta umfar hava Føroyar 11 stig, meðan maltesar eru nummar 2 í bólkinum við 8 stigum.

Harvið er lagt upp til eina veruliga finalu á Ta Qali Stadion á Malta týsdagin 17. november klokkan 19:45 millum Malta og Føroyar.