Formula letur upp deild í Klaksvík
Vit vilja vera nærri kundanum og ein liður í hesum er at spjaða virksemi kring um landið, heldur enn bert at vera í Tórshavn. Vit hava nógvar góðar kundar í Klaksvík, sigur Fróði Magnussen stjóri í Formula.
Norðlýsið hevur vent sær til stjóran í Formula, ið er ættaður úr Klaksvík. Fróði Magnussen, stjóri, er abbasonur Petur Karl Hansen, sum búði á Bumshamri. Petur Karl Hansen var formaður á Norðborg tann tíð tað var. Fróði hevur nógv góð minnir frá Klaksvík. Sum smádrongur, var eg javnan á floti við abba mínum við bátinum Freyr, og ofta gekk leiðin norður gjøgnum Djúpini, minnist Fróði.
Formula er í roynd og veru longu flutt norður, men vegna Corona hevur høvi ikki verið til at starta reiðiliga upp í Klaksvík enn. Tað høvið kemur so nú. Nýggja deildin skal húsast í sama bygningi sum Føroya Tele, t.v.s. í gomlu Telefonstøðini. Virksemið hjá Formula vendir sær fyrst og fremst til fyritøkur, og snýr seg m.a. um ráðgeving og forritan. Millum tænasturnar, sum venda sær til vinnulívið í Klaksvík, kunnu nevnast ein tíðarskrásetingarskipan, lønarskipanir og journalskipanir.
Spurdur um, hvat endamálið er við at opna eina deild í Klaksvík, sigur stjórin, at tey sum fyritøka fegin vilja vera nærri kundanum, og ein liður í hesum er so at spjaða virksemið kring um landið, heldur enn bert at vera í Tórshavn. Formula hevur longu skrivstovur í Tórshavn, Runavík, Taastrup í Danmark og nú eisini í Klaksvík. Nøkur av starvsfólkunum á Formula búgva longu í Klaksvík, og tey fara nú at sleppa undan bæði koyring og tunnilsgjaldi.
Fróði Magnussen sigur, at tey raðfesta trivnaðin hjá starvsfólkunum høgt, og hendan deildin er eisini sett á stovn fyri at taka atlit til tað. Virksemið á deildini og hjá Formula sum heild snýr seg umframt omanfyrinevnda eisini um hýsing, t.e. at leggja servarapláss til data v.m.
Norðlýsið hitti tann fryntliga og í Klaksvík so væl kenda Símun Michael Sørensen, og vit fingu mynd av honum. Hann letur væl at teimum nýggju, snotiligu hølunum á gomlu telefonstøðini. Formula leigar høli frá Føroya Tele, og hava í tí sambandinum innrættað hølini eftir sínum tørvi.
Fyri fyrst fara 5 fólk at arbeiða á Formula-deildini í Klaksvík, men ætlanin er at økja um starvsfólkahópin her, sigur Fróði Magnussen við Norðlýsið at enda.