Tað man vera fáur í Klaksvík, ið ikki kenst við navnið Sonhard Johannesen, tað verði seg innan klubbavirksemi, innan billard, sum trykkførara, innan fótbóltin, innan tónleikin, innan bryggjaríbransjuna, av Høvdavirkinum, ella í øllum førum úr sjónvarpinum.

Tá Kringvarp Føroya fyri tíggju árum síðani skuldi finna “røddir” í fólkinum at umboða nøkur av heraðshornunum í landinum, var neyvan nakar bilsin um, at eitt av valunum fall á túsundkunstnaran Sonhard Johannesen í Klaksvík, og tað fall honum í lut at tala søk norðoyinga mótvegis m.a. tí í Tórshavn so navnframa Inga Sørensen, ið nærum líka íðin tosaði fyri borgaran í høvuðsstaðnum.

Hesi uppgávu kom Sonhard stak væl frá, og tey sum kenna Sonhard, kunnu ikki hava væntað nakað annað, tí hann er prinsippfastur, dugir væl at málbera seg og tala fyri seg og tey, hann umboðar. Sonhard er tiltikin hittinorðaður. Sonhard eigur sín stóra lut í munadyggum trivnaðarvirksemi í Klaksvík, og helst er hann best kendur úr Klaksvíkar Billardfelag og Klaksvíkar Klubba. Vit kenna hann eisini sum trummusláara í Ólavur Presley And His Dirty Rag Rags.

Onkuntíð hava aldurnar gingið høgt í lívinum hjá Sonhardi, og í 2017 varð hansara arbeiðspláss, Høvdavirkið í Leirvík, rakt av hópuppsøgnum, tí at bæði nigerianski marknaðurin og oljumarknaðurin sveik. Tá fylgdu vit øll samkennandi við, og gleddust við honum eitt ár seinni, tá hann sum sjálvsagt ein av teimum fyrstu varð settur aftur.

Nú á 67-ára degnum fær navnframi klaksvíkingurin, sum hevur tænt fyri seg og meira enn tað, so møguleika fyri at njóta sítt otium, men kenna vit Sonhard rætt, so merkir tað ikki, at vit hava hoyrt tað seinasta til hansara. Tí Sonhard hevur ongantíð trivist í tómgongd.

Við hesum fátæku reglum við Norðlýsið ynskja Sonhardi Johannesen hjartaliga tillukku við teimum 67 árunum og mong góð ár framyvir.