Nú skal "kavari" setast á stabban á Hellisenda
Í 82 ár hevur Stabbin á Hellisenda við Borðoyarvík staðið ímóti briminum. Nú er so ætlanin at gera hann enn meira sjónligan, við at seta ein kavara upp á hann. Stabbin varð ætlaður til havsvimjarar at kava av, til tað høvdu menn afturi í 1938 stoypt Stabban og gjørt hann út við eini fjøl, ið kundi stingast ígjøgnum Stabban, soleiðis at svimjarar kundu kava av honum.
Stabbin hevur ikki verið serliga nýtiligur til endamálið, tí har er grunt at kava av, og Jógvan Gerðalíð, sáli, sigur í endurminningum sínum, at hann einaferð royndi at kava, men at hann sló høvdið í botn, "eg fekk ógvuliga ilt", sigur hann. Einasti maður sum tá, hetta er í 1938, dugdi kynstrið at kava í grunnt var: "Erling Høgnesen, (sáli) Erling var sum ein selur í luftini, og tá hann stakk seg undir, kom hann upp aftur alt í einum".
Nú hevur Ólavur Samson staðið fyri at evna ein "Kavara" til úr stáli. Archibald Black hevur teknað og kavarin er skorðin úr stáli á Norðoya Blikksmiðju. Kjartan Hansen á Mekanor hevur sveisað teir ymisku lutirnar saman. Nær kavarin verður settur á Stabban við Hellisenda er ikki fastlagt, tí tað arbeiðið má lagast eftir veðrinum.