Elisabeth Joensen, sum er uppvaksin á Oyri, byrjaði at binda eitt teppi til Skúvadalshúsið skjótt eftir at Skótalið Nólsoyar Pálls var byrjað at byggja nýggja Skúvadalshúsið.

Í dag kundi hon so handa teppið til leiðaran fyri SNP Árna Skaale teppið. Elisabeth segði, at henni kom til hugs, at tað var komið fyri í hennara tíð, at fólk vóru illa komin eysturi á fjøllum, og at Skúvadalshúsið tá var komið væl við sum skýlið fyri illveðri. Eg helt, segði hon, at tað kundi gera gagn at seyma eitt teppi at leggja inn í húsið, soleiðis at tað kanska kundi koma onkrum væl við, ið søkti sær skjól har, kanska fyri veðri, fyri óhappi, ella bara tí onkur var illa fyri.

Elisabeth hevur merkt á teppið nær tað var liðugt tilevnað, tað var í 2017, umleið tvey ár eftir at byrjað var upp á Skúvadalshúsið.

Árni Skaale takkaði Elisabeth fyri og helt at teppið kundi vera partur av tilbúgvingini í Skúvadalshúsinum. Hann segði eisini, at hann var ovfarin av hvussu stóra vælvild ímillum fólk, Skúvadalshúsið hevði fingið, síðani farið var undir hetta stóra tiltakið. Vælvildin hevur fjálgað og hevur verið við til at hildið okkum í gongd, soleiðis at vit kunnu siga, at tað í veruleikanum ikki er ein snøkil eftir at gera har eysturi, húsið er liðugt, men sjálvandi dalurin er stórur so har eru nógvir møguleikar til ymiskt virksemi hjá øðrum.