Væl nøgdir við Christian
Teir fylgdu strongum korona reglum tá teir lótu "Margret" av hondum til føroyingar. Fimm íslendingar sigldu Margret til Klaksvíkar, her hon framhaldandi fer at bera navnið Christian. Ongin føroyingur slapp umborð fyrr enn íslendingar vóru farnir við egnum bili av Ánunum og beinleiðis á flogvøllin í Vágunum, har leigað flogfar stóð og bíðaði eftir teimum.
Eftir at íslendingarnir høvdu lukka skipið av og tikið tað teir skuldu hava heim aftur við, sluppu vit sum stóðu og bíðaðu á keiini umborð.
Hetta er ikki eitt nýtt skip, men eitt skip, sum er skrivað um aðrastaðni her á síðunu. Tó vóru menn sera væl nøgdir við standin, sum skipið er í. Sagt varð umborð, at skipið hevur verið í drift til fyri bert tveimum mánaðum síðani. Allastaðni har Norðlýsið vitjaðið umborð, var sera reint og vælhildið. Á brúnni vóru at kalla øll tól, ið verða brúkt á slíkum skipi í dag, góðar umstøður vóru í galluni og í messuni og í maskinrúminum tóktist vera framúr væl hildið. Tað sum manningin helt um skipið var, at teir hildu at teir skuldu fara at venja seg við at tað var lítið pláss á dekkinum. Vit eru vanir við rúmligari dekk enn hetta, men hetta er okkum ikki ókent, so tað skal nokk fara at ganga, segði ein, vit tosaðu við.
Sum sagt, so skal hetta skipið bert verða í hondunum hjá "Christian í Grótinum" í umleið eitt ár, til nýggi Christian í Grótinum fer av barkastokki.