Føroya Rættur ógildað løgtingslóg
Vágaportalurin veit í dag at siga frá, at eitt mál hevur verið fyri í Føroya Rætti, har Landsstýrið er dømt at tapa, og at ásetingin í § 7, stk. 2 í løgtingslóg um serstakar treytir fyri fiskiskapi fyri 2016 er dømd ógildug at vera. Harvið hevur rættarskipanin á fyrsta sinni sett eina løgtingslóg til viks.
Tað var Høgni Hoydal, táverandi fiskimálaráðharri, sum legði uppskotið fyri Løgtingið. Lógargreinin, § 7, stk. 2, ásetti, at gjald fyri kvotur, sum vórðu keyptar á uppboðssølu, kundu ikki verða drignar frá frá søluvirðinum av veiðuni í sambandi við at útgjalda hýrur til manningina. Vágaportalurin veit at siga, at umsitingin í Løgtinginum ávaraði løgtingsfólkini um, at varð lógin samtykt og íverksett, so kundi tað viðføra endurgjaldsskyldu.
Sambært VP.fo kann Landskassin nú rokna við endurgjaldskrøvum, tí reiðarí hava verið fyri tapi av lógini. Orsøkin til, at Føroya Rættur nú hevur ógildað ásetingina/lógina er, at hon er í stríð við bæði tann europeiska mannarættindasáttmálan og við grundlógina. Ein lóg, ið stríðir ímóti grundlógini, missir nevniliga sítt gildi.
Um endurgjaldskrøv koma, og hvussu stór tey tá verða, er enn ógreitt, men í fyrstu syftu er Føroya Landsstýri so dømt at gjalda 576.000 krónur í sakarmálskostnaði.
Kelda: Vágaportalurin