Tað er  ein vika síðani Stjørnan eftir innleiðandi dystin í steypakappingin imóti Neistanum sendi inn klagu til HSF, tí tey meina, at dómararnir gera ein feil, tá teir í seinastu sekundunum av dystinum góvu stjørnuleikara útvísing fyri at hava órógva Neistan í samband við 3-meturkast, og harafturat døma brotskast til Neistan, sum Neistina skoraði uppá, og harvið vann dystin 24-23.

Norðlýsið hevur fregnast hjá Stjørnuni, og siga tey, at tey onki hava hoyrt aftur um klaguna, hóast tey hava rykt eftir eini niðurstøðu.

Sum Norðlýsið skilir, so sigur Stjørnan í klaguni, at dómararnir gera ein feil, tá teir døma brotskast, tí í hondbóltsregnulunum stendur, at um leikari á ósportligan hátt í teimum seinastu 30 sekundunum av dystinum órógvar mótistøðulinum í møguleika at koma til skot ella skotstøðu, so kunnu dómararnir ”burturvísa” leikaran sum órógvar mótstøðuliðið, og síðani døma brotskast. Tað er her, at Stjørnan sigur, at dómararnir døma skeivt, tí teir geva Stjørnuleikaranum ”bert” 2 minuttir útvísing, og alíkavæl døma straffi.

Spennandi verður at hoyra hvørja niðurstøðu HSF kemur til, tí niðurstøðan kann hava stóra ávirkan á støðuna í bólkinum. Leikt eru tvey av trimum umførum, og støðan er tann, at Neistin er á odda við fýra stigum, H71 hevur trý stig, Stjørnan hevur 1 stig, meðan VB er aftast við ongum stigi.

Um so er, at Stjørnan far viðhald í klaguni, so broytsist alt í bólkinum, óansæð hvør niðurstøðan verður. Tað mest sannlíka er, um Stjørnan fær viðhald, so skal dysturin leikast av nýggjum, og tá verður støðan í bólkinum undan dystinum, at H71 hevur trý stig, Neistin tvey stig og Stjørnan eitt stig, og so kann alt henda. Í seinasta umfarinum eru dystirnir hesir H71-Neistin og VB-Stjørnan.