Nógv ivamál í KÍ-hópinum undan kappingarbyrjan
Tríggir leikarar hava ongan venjingardyst spælt.
KÍ spældi fríggjakvøldið sín síðsta venjingardyst. Til dystin manglaði KÍ fleiri leikarar og sum heild er ivamál, hvørjir av hesum vera tøkir til kappingarbyrjan um eina viku 7. mars, tá KÍ spælir 1. umfar móti B68.
Fleiri leikarar hava enn ongan venjingardyst spælt og tí má tað metast sum sannlíkt, at hesir í øllum førum ikki byrja inni 7. mars móti B68 í 1. umfari. Verjuleikarin Jesper Brinck og álopsleikarin Ivar S. Rønning hava verið skaddir nærum alt árið higartil og hava ongan dyst spælt enn. Daniel Bjørkman kemur til landið hetta vikuskiftið og skal síðani í sóttarhald.
Afturat hesum, so vóru Jonn Johannessen, Dávid Langgaard og Jasper Van Der Heyden ikki við í dystinum í gjár vegna skaðar. Sostatt er óvist um eini fimm-seks leikarar til kappingarbyrjan undan síðstu venjingarvikuni undan dystinum.