Ótolandi umstøður hjá línuskipunum at arbeiða undir
Ein skipari hevur vent sær til Norðlýsið, eftir at kunngerðin um kvotur á Flemish Cap letur bíða eftir sær. 1. februar 2021 var kunngerðin um at skipa kvotunar á Flemish Cap og Grønlandi til eginkvotur send út til hoyringar, har hoyringarfreistin var úti 12. februar. Men nú vit skriva 18. mars, er einki víðari hent, og kunngerðin liggur enn í Fiskimálaráðinum.
Leysasøgur runt um í krókunum siga, at orsøkin til at einki hendir er, at sjálvur løgmaður hevur blandað seg uppí, hvussu Fiskimálaráðið skal býta kvotunar út, og sostatt víkir frá siðbundnum hátti at útluta kvotur. Orsøkin til, at løgmaður hevur blandað seg, sigst vera, at ein kenningur hjá løgmanni skal hava størri kvotu enn hvat hann hevði fingið við siðbundna útlutingarháttinum.
Í løtuni liggja summi línuskip undir Føroyum og fiskaríið er smáligt. Tey kundu havt verið undir Íslandi, har fiskiskapurin er góður, men í staðin liggja tey “standby”, um tað nú knappliga endar so, at tað knappliga endar við olypiskum fiskiskapi í Grønlandi og á Flemish Cap. Tey línuskipini, sum eru til fiskarí við Ísland, verða helst noydd at bróta túr av, um alt endar í óskipari kappfisking.
Tey einastu skipini, sum ikki hava fingið allar kvotur útlutaðar sum eginkvotur, eru línuskipini.
Hetta eru ótolandi umstøður at arbeiða undir, fyri ikki at siga ómenniskjaligar, sigur skiparin, ið hevur sett seg í samband við blaðið.