Karl Johansen, borgarstjóri, sigur, at eftirspurningurin eftir dagstovnaplássum her í kommununi er nú so nógv øktur, at tað verður mett, at ein bráðfeingis dagstovnaloysn krevur at verða funnin, um kommunan framhaldandi skal kunna bjóða sínum borgarum nøktandi tænastu og sleppa undan, at bíðilistin verður ein støðugt vaksandi trupulleiki.

Borgarstjórin og formaðurin í trivnaðarnevndini børn og ung, Eyðstein Poulsen, hava í tøttum samstarvi við starvsfólk á dagstovnaøkinum, Norðoyrarnevndina og kommunalu umsitingina arbeitt við hesi bráðfeingisloysnini.

- Eyðstein Poulsen sigur, at tað er alneyðugt, at kommunan nú ger eitt eyka átak og útvegar eina bráðfeingis loysn við á leið 30 dagstovnaplássum, sum seinni kann økjast, soleiðis at rúm verður fyri fýra barnagarðsstovum. Við hesari loysnini varðveitir kommunan ansingartrygdina til sínar borgarar, samstundis sum hon keypir sær tíð til at arbeiða miðvíst víðari við størri varandi loysnum, sigur Eyðstein Poulsen, sum fegnast um góðu tilgongdini, sum hevur verið í samband við hesa fyrireikingina.

Borgarstjórin leggur afturat, at tað hevur stóran týdning fyri avgerðina at vita, at starvsfólk í Fjallafípuni eru væl nøgd við umstøðurnar í nýggjasta bygninginum í Fjallafípuni, nú farið verður undir at byggja eina líknandi loysn.

Sáttmálin við Norðhús, ið var undirskrivaður eftir býráðsfundin í kvøld, er ein heildararbeiðstøka, har samlaði kostnaðurin fyri barnagarðin við uttanumøki er 8.674.500 kr.