KÍ og HB hvíldu leikarar til toppbrakið mikukvøldið
Tað sást aftur hjá KÍ og HB í dag, at tey høvdu toppdystin mikukvøldið í huganum.
Hjá KÍ vóru fleiri leikarar, sum ikki vóru við í dag, aðrir byrjaðu á bonkinum og aðrir blivu tíðliga útskiftir. Deni Pavlovic, Bob Sumareh og Daniel Bjørkman vóru ikki í hópinum í dag vegna skaðar/snuddir. Síðani byrjaðu Boris Dosljak og Kristian Joensen á bonkinum. Kristian hevur annars byrja inni allar dystirnar, meðan Boris hevur byrjað allar uttan ein. At skifta málverja er meira óvanligt og so vil tíðin vísa, um hetta bara var fyri at geva Mathias Rosenørn ein dyst ella um hann er komin inn fyri at vera í eina tíð. Í hálvleikinum fór Árni Frederiksberg av vøllinum, tá KÍ førdi 3-1. Hann sá ikki út til at vera skaddur.
Hjá HB sótu Hørður Askham og Michal Przybylski á bonkinum allan dystin, meðan Heðin Hansen bleiv skiftur út eftir ein tíma. Heri Mohr, Stefan Radosavljevic og Hilmar Leon Jacobsen komu á vøllin. Leikarar sum Jákup Thomsen og Mads Mikkelsen vóru ikki í hópinum.
Toppdysturin millum KÍ-HB verður mikukvøldið kl. 19.00.