Nýtt torg til sølu av fiski, kjøti, fugli og øðrum við bátabrúgvarnar
Ofta hevur verið tosað um, at Klaksvík hevur mangla eitt stað til tey ið ynskja at keypa, ella selja fisk og annað. Nú hava feðgarnir Hjaltur Poulsen og sonurin gjørt hetta møguligt.
Á facebook vanganum hjá Hjaltur Poulsen, legði Hjaltur út vakrar myndir av einum nýggjum sølutorgi, ið hann og sonurin hava tikið stig til.
Staðsetingin við bátabrúgvarnar rigga væl, og ongin ivi er um, at hetta verður væl mótikið av Klaksvíkingum.
Hjaltur skrivar soleiðis á sínum vang:
Kl 05.00 í morgun(sunnumorgun) festu vit hetta við bátabrúgvarnar í Klaksvík. Hetta hevur verið ein dreymur hjá mongum í mong ár. Eg og sonurin hava tikið stig til hetta við loyvið frá Klaksvíkar kommun. Og við góðari hjálp frá TTS o.ø., hava vit fingið hetta uppfylt. Vónandi fáa øll gleði av hesum. Hetta er nú tykkara.
Ein bólkur er gjørdur á facebook‚ sum eitur “Neystið”. Øll eru vælkomin inná bólkin.
Inni á bólkinum, ið er stovnaður á facebook stendur soleiðis:
Hesin bólkurin er ætlađur til fólk iđ ætla at selja og keypa bæđi fisk, kjøt, grønmeti fugl og alt annađ sum verur veitt. Her kann man siga frá um hvat og nær man ætlar sær at selja í "Neystinum", viđ bátabrúgvarnar í klaksvík.
Vit á Norðlýsinum ynskja Hjalta og soninum hjartaliga tillukku við hesum íkastinum til økið kring bátabrúgvarnar.