Hátrýstið fer at flyta seg spakuliga eystureftir, meðan eitt lágtrýst trokar seg ímóti okkum vestanífrá. Sunnudagin skiftir luftrákið frá at koma av evropeiska meginlandinum til at koma av leiðunum yvir miðjum Norðuratlantshavi. 

Meira ítøkiligt, so hevur ættin malið eitt sindur í seinnapartin, men fyri tað mesta av suðuri. Vindferðin er og hevur verið lítil - minni enn 5 m/s - og tað er skýggjað og í støðum sirm, ella surk. Hitin liggur um 10 til 12 stig.

Soleiðis fer restina av degnum at vera.

Í morgin fer ættin at vera um sunnan ella beint eystan fyri sunnan. Vindferðin fer at vera um 5 m/s. Turt fyrrapartin, men seinnapartin kunnu ælingar væntast í støðum.

Hitin leygardagin fer at liggja um 10 til 12 stig.

Sunnunátt og -morgun fer vindurin at veksa eitt sindur - upp í 5 til 10 m/s. Ættin framvegis sunnan ella eysturhall suðurætt og ælaveður.

Seinnapartin sunnudagin fer vindurin at veksa upp í  8 til 13 m/s av suðuri. Ein kuldabrúgv við regni fer at koma til okkara vestaneftir. Tað fer at regna eina løtu eftir middag. Í aðrar mátar ælaveður sunnudagin.   

Hitin sunnudagin fer eisini at liggja um 10 til 12 stig. 

Gott vikuskifti.