Veðrið í vikuni
Í vikuni, sum kemur, fara lágtrýst at ímóti okkum úr ymsum ættum. Tey taka leiðina úr USA vestur í hav ímóti Evropa, men stóra og sterka hátrýstið yvir Mið- og Eysturevropa steðgar teimum og broytir teirra kós og ferð.
Tí fara lágtrýstini at nærkast Føroyum bæði norðaneftir, vestaneftir og sunnaneftir.
Veðrið meira ítøkiligt – dag fyri dag:
Mánadagin er útsynningur, 3 til 8 m/s – onkra løtu seinnapartin 5 til til 10 m/s. Skýggjað og turt fyrrapartin, men regn eina løtu seinnapartin. Hitin fer at liggja um 11 til 13 stig.
Týsdagin nakað tað sama sum mánadagin, tó eitt sindur minni vindur. Ættin fer at liggja um útsynning, og vindferðin um 3 til 8 m/s. Yvirhøvur turt týsdagin, tó onkur æl í støðum. Hitin fer at liggja um 12 til 14 stig.
Mikudagin er framvegis útsynningur, og vindferðin um 3 til 8 m/s. Um kvøldið fer at mala úr ymsum ættum. Mikunátt, -morgun og fyrrapartin regnar. Seinnapartin slítur í, tó kanna okkurt ælið væntast. Hitin fer at liggja um 12 til 14 stig.
Hósdagin er eysturætt, lítil vindur á morgni og fyrrapartin, um 3 til 8 m/s, men hann veksur eitt sindur, upp í 5 til 10 m/s út á seinnapartin. Hitin fer at liggja um 10 til 12 stig.
Fríggjadagin norðan og útnyrðingur. Vindferðin fer at liggja um3 til 8 m/s. Ælaveður allan dagin. Hitin fer at liggja um 9 til 11 stig.
Leygardagin veksur vindurin upp í 10 til 15 m/s úr útnyrðingi ella útnyrðingi-norði. Skýggjað og yvirhøvur turt – tó okkurt æl um kvøldið. Hitin fer at liggja um 9 til 11 stig.
Sunnudagin er sama ætt sum leygardagin, men vindur fer at minka niður í 3 til 8 m/s. Løtur við regni um morgunin og fyrrapartin, men turt seinnapartin og um kvøldið.
So vit fara at fáa eitt sindur av hvørjum í vikuni.