Nú er at hava framskrúvu
Nú heystíð er og útróðurin er farin undir at royna og rygga til vetrarútróðurin, síggjast glottar í fiskiskapinum. Á Søluni í morgun vóru hesir millum aðrar: Stakkavík 4.600 pund, Líðhamar 7.000 pund, Bragd 4.700 pund og Brandur 5.500 pund. Hetta eru nøgdir sum eru heldur frægari enn nøgdirnar hava verið í summar, burtursæð frá royndunum, sum bátarnir hava gjørt á Bankanum.
Harafturat er prísurin góður í løtuni: Toskur 1 fór fyri knappar 35 krónur í meðal, toskur 2 fyri 30 krónur og toskur 3 fyri 23 krónur. Hýsuprísirnir eru eisini góðir: Hýsa 1 fór fyri 22,5 krónur í meðal, hýsa 2 fyri 30 kr. og hýsa 3 fór fyri 23 krónur.
Tá vit vóru á Stongunum fyri løtu síðani, bar til at koma framat fyri virkseminum hjá Borg á økinum har, tá var nógv stakan av útróðrarfólki, bæði egnarum og útróðrarmonnum. Liðhamar lá norðastur, teir fingu sær helst ein lúr áðrenn fari var avstað aftur, Bragd tað sama og sunnastur lá Norðsøki, teir tóku stamparnar inn. Eyðálvur Vang skipari og reiðari segði, at teir helst fara norður úr Barinum at seta línuna í kvøld.
Annars er heystartíð og menn ganga skurðfjøllini. Janus Sørensen á Brandi segði fyri løtu síðani at teir fara avstað aftur í kvøld, men at tað kundi vera at teir mistu onkran dagin av fjallgongu hesa vikuna.