Ræðsluhúsið í Klaksvík
30. oktober letur Ræðsluhúsið í Klaksvík aftur dyrnar upp fyri ræðsluslignum gestum, nú tóma loftið í Klingrugarði 10. er umskapað til eina villiniborg, har ófriður og nøtran reika millum trongu veggirnar
Minnist tú Ræðsluhúsið hjá Klaksvíkar sjónleikarafelag? Hesi ikonisku gulu læknahúsini í Klaksvík, sum í 2019 vóru umskapaðið til eitt stað, har djúp ræðsla, ring marra og myrkur ótti, vóru manaði fram úr tí goymda, og inn í veruliga veruleika tín?
Rennur tað tær kalt niður eftir rygginum sum tú lesur hettar, so er tú ein av teim, ið vitjaðu Ræðsluhúsið -og var so heldigur at sleppa út aftur í livandi líki!
Íðan, tað var møguliga tú sum pissaði í buks av berum bangilsi? Ella sum rópti eftir mammuni, tá ið tín seinasta løta tyktist nær? Um tú kennir teg aftur, sum tann ið skumpaði systur tína framman fyri teg, í vón um at ræðuleikin tók hana heldur enn teg, so er hettar onki at skamma teg yvir. Soleiðis er við Ræðsluhúsinum: tað kallar fram kenslur og týðiligger síður av tær sjálvum, ið tú ikki vildi kennast við frammanundan.
Í stórsligna tómleikanum uppi á loftinum í Spinnarínum í Klaksvík, hevur í rúma tíð kvirra valdað. Ja ein kann siga, at loftið hevur ligið stein deytt -og tá ikki uppá tann góða mátan! Tí er tað uppá tíðina, at Klaksvíkar sjónleikarafelag enn einaferð fyllur loftið við lívi -og deyða.
30. oktober 2021 letur Ræðsluhúsið í Klaksvík aftur dyrnar upp fyri ræðsluslignum gestum, nú tóma loftið í Klingrugarði 10. er umskapað til eina villiniborg, har ófriður og nøtran reika millum trongu veggirnar.
Ver vælkomin til eina óunniliga vitjan í ræðslunnar villiniborg. Men ansa eftir. Ikki villast.
Atgongumerkir kunnu keypast á atgongumerki.fo. Og um tú kennir teg heldigan, so er at leita tær inn á Facebook síðuna hjá Klaksvíkar sjónleikarafelag, har tað ígjøgnum spurnarkappingar, verður møguleiki at vinna atgongumerkir til Ræðsluhúsið. Góða eydnu!