Christian Eriksen helst kunngjørdur í Brentford innan 3 dagar
Tað er nógv sum týður upp á, at stóra stjørnan á danska landsliðnum, aftur verður at síggja í Premier League. Hann spældi við Inter, men av tí at hann small um við hjartatilburði undir EM, mátti sáttmálin uppsigast. Tað er nemliga ikki loyvi, at spæla við pacemakara(hjartakvikil) í Seriu A.
Hóast gitingarnar hava verið sera nógvar um framtíðina hjá Christian Eriksen, so eru tað fleiri og fleiri miðlar, ið vænta, at kendi danski leikarin fer at halda fram við yrkisleiðini í Brentford.
Brentford flutti upp í Premier Leauge í fjør, og hevur yvirraska í bestu ensku deildini. Fleiri danskir spælarar leika við felagnum, umframt at fyrrverandi danski venjarin hjá Brøndby, Thomas Frank, hevur høvusábyrgdina av liðnum.
Umframt Brentford, hevur annars verið gitt, at Christian Eriksen møguliga skuldi gera eitt "come back" í Tottenham, har hann hevur spælt stóran part av sínari fótbóltstíð. Miðlar hava eisini róð framundir, at feløg sum Aston Villa, Leicester og Newcastle hava umhugsað ein møguligan sáttmála við spælaran, men mest sannlíkt verður tað Brentford, sum fær gleði av framúrskarandi evnunum hjá danska miðvallarinum.
Brentford liggur í løtuni á 14'plássi í deildini.