Veðrið í vikuni
Nú er broyting í veðrinum. Kuldin er við at sleppa okkum á hesum sinni, og ístaðin fáa vit lýggjari luft til okkara úr Evropa. Hitalagið fer at hækka úr 1 stigi í morgun upp í 9 stig miðskeiðis í vikuni.
Ættin fyrra partin av vikuni fer at vera landsynningur; eftir tað útsynningur sunnan ella sunnan.
Ikki nógvur vindur í vikuni, sum stendur fyri framman. Týsdagin og hósdagin vera løtur við vindferð upp ímóti 15 m/s. Vindferðin fer fyri tað mesta at liggja um 8 til 13 m/s.
Fleiri dagar fara at vera turrir - heilt ella partvíst. Tveir dagar við nógvum avfalli, týdagin og hósdagin.
Veðrið í dymbildagavikuni (páskavikuni) - dag fyri dag:
Mánadag: Landsynningur, 8 til 13 m/s, turt og skýggjað við sólglottum. Hitin fer at hækka úr 1 stigi upp í 5 stig.
Týsdag: Landsynningur, 10 til 15 m/s. Skýggja og regn - ikki so nógv á morgni, men meiri út á fyrrapartin og restina av degnum. Hitin fer at liggja um tey 5 stigini.
Mikudag: Landsynningur, um kvøldið landsynningur sunnan, 10 til 15 m/s um náttina, men minkandi út á morgunin niður í 5 til 10 m/s. Ælaveður um náttina, men tað slítur í á morgni, tó kunnu ælingar væntast allan dagin. Hitin fer at liggja um 5-6 stig.
Skírishósdag: Landsynningur sunnan, 8 til 13 m/s, um kvøldið eitt sindur meiri vindur, 10 til 15 m/s. Skýggjað og turt um náttina, men tað fer at regna fram ímóti morgni, og tað regnar allan dagin. Hitin fer at liggja úr 6 upp í 8 stig.
Langafríggjadag: Útsynningur sunnan, 5 til 10 m/s. Turt allan dagin, skýggjað við sólglottum. Hitin fer at liggja um 8 stig.
Leygardag - páskaaftan: Útsynningur sunnan og sunnan, 5 til 10 m/s. Turt og klárt veður. Hitin fer at liggja um 7 til 9 stig.
Páskadag: Útsynningur sunnan og sunnan, 8 til 13 m/s. Yvirhøvur turt, skýggjað við sólglottum. Okkurt regnælið. Hitin fer at liggja um 8 til 9 stig.