Atlantic Fair letur upp í morgin kl. 10.00
Størsti parturin av ítróttarøkinum í Klaksvík verður í komandi døgum brúktur til stóru altjóða framsýningina ATLANTIC FAIR.
Norðlýsið var á staðnum í morgun og fregnaðist um gongdina hjá ATLANTIC FAIR nú evstamark nærkast fyri, at framsýningin letur upp.
Áki í Skemmuni, stjóri fyri tiltakinum segði, at tað hevur gingið sera væl hesaferð eisini, at fingið áhugaðar framsýnarar. 193 framsýnarar hava bás í hallunum í Klaksvík. Framsýnararnir koma úr 19 ymiskum londum, so sigast má, at ATLANTIC FAIR fær alt størri undirtøku ímillum virkir í vinnuni, ikki minst uttanlanda frá. At enda segði Áki í Skemmuni, stjóri, at umframt terir 193 framsýnarar, so sluppi ikki allar fyritøkurnar við, orsakað av plásstroti og harafturat hava fleiri longu nú biðið um pláss til framsýningina um tvey ár.
Stevnan verður sett av løgmanni í morgin klokkan 10.00 Klokkan 13 heldur Jákup Bech Jensen ein fyrilestur hann kallar “Leiðsla og innovatión í broytingartíðum”. - kl. 14. heldur Rógvi Olavson ein fyrilestur undir heitinum “Vøkstur við skili” og kl. 15 halda Johnny í Grótinum, Katrine Zacho og Majbritt Skov fyrilestur undir heitinum “Kann partalag millum almenna og privata geiran lyfta íløgutørvin?”
Framsýningin er opin í morgin týsdagin frá 10 til 17, mikudagin frá 10 til 17 og hósdagin frá 10 til 16. - Fyrilestrar eru á skránni eisini mikudagin og hósdagin.