Thetis kann fyribyrgja fiskafelli
Arnfinnur Kallsberg, ið er ph.d.-lesandi hjá Thetis, ið luttekur á Atlantic Fair í Klaksvík, er í holt við eina áhugaverda verkætlan um at lesa arvastreingir hjá lívverum og eisini at staðfesta bakteriur í fiski longu tíðliga og harvið steðga sjúkuútbrotum, áðrenn tey henda.
Arnfinnur Kallsberg hevur ognað sær eitt tól, ið kann lesa arvastreingirnar hjá øllum lívverum ella livandi organismum í einari roynd, líka mikið um talan er um mold, vatn, sjógv ella blóð. Við at hava ein tílíkan prøva kann staðfestast, hvat er í, heilt niður á mýlstøði ella molekylért niveau, sum Arnfinnur orðar tað.
Spurdur um hvat samband hetta hevur, ella kann hava, við sjóvinnu at gera, svarar Anfinn, at til ber at filtrera sjógv, ið kann nýtast í sambandi við eitt nú stovnsmetingar. Tað kann eisini brúkast til at staðfesta virus og bakteriu í fiski. Er eitt stórt felli í fiski onkustaðni, ber til at nýta tólið til at staðfesta, um sjúka er atvoldin.
Til ber eisini at brúka tólið fyribyrgjandi við at gera reglulig eftirlit, ið kunnu staðfesta t.d. patogen og bakteriu, áðrenn hon fær fastatøkur, og seta neyðug átøk í verk fyri at fyribyrgja spjaðing.
Av tí at hetta er rættiliga nýtt, bæði tøknin og háttalagið, er hetta ikki so útbreitt enn, sigur Arnfinnur. Talan er um nakað slóðbrótandi og nýtt, sum Thetis nú vil bjóða fram sum eina tænastu framyvir, og Arnfinnur Kallsberg væntar, at til ber hjá eitt nú alivinnuni at spara heilt fitt av peningi, umframt at tað sjálvsagt er gott fyri djóravælferðina hjá fiskinum.